مام جەلال و پێشمەرگە دێرینەکان

بە بۆنەی ئەو گۆڕانکارییانەی لەم دواییانەدا لەناو ئۆرگانەکانی یەکێتیدا کراون و دەکرێن . دەمەوێ رووداوێک بگێڕمەوە کە خۆم شایەتحاڵی بووم لەسەر هەڵوێستی رەوانشاد مامی گەورەمان .
ساڵی ١٩٩٥ لەگەڵ گەڕانەوەی خوالێخۆشبوو کاک عادل موراد بۆ ناو یەکێتی منیش لەگەڵی بووم . ئەو کاتی من بەڕێوەبەری نوسینگەکەی بووم . سەرەتای کارکردنی کاک عادل وەکو لێپرسراوی مەکتەبی راگەیاندن ، داوای لیستێکی لێکردم بە ناوی کادیروکارمەندەکانی مەکتەبەکە لەگەڵ دەستنیشانکردنی کارو ئەرکەکانیان لە مەکتەب بۆ ئەوەی ئەگەر کەسێک ( فائض ) واتا زياد بێت لەسەر میلاک لابدرێ . منیش لیستەکەم ئامادەکردو پێمدا . هەندێ ناوی تیا بوو کە چالاکییان نەبوو بەڵام لەسەر میلاکی مەکتەب دانرابوون. یەکێک لەوانەش پێشمەرگەیەکی سەردەمی خەباتی شاخ بوو بە ناوی هەڤاڵ ( هێمن ) کە چاوەکانی تەواو نەبوون بەڵام بۆ دابینکردنی مووچە و بژێوی ژیانی خۆی و خێزانەکەی لەسەر میلاکی مەکتەبی راگەیاندن دانرابوو . کاتێک کاک عادل بڕیاریدا ئەو کارمەندە زیادانە مووچەکانیان ببڕدرێ و لیستەکەی ناردە لای مام جەلال  . دواتر لە سکرتێرەکانی مام زانیم کەوا کاتێک مام جەلال سەیری لیستەکەی کردبوو زۆر تووڕە ببوو و مستێکی لە مێزەکە دابوو گوتبووی: هەر ئێستا عادلم بۆ بانگ بکەن . کە کاک عادلیش چووبووە لای مام سەرزەنشتی کردو پێی گوتبوو : تۆ چۆن ناوی ئەو پێشمەرگەیەت تێکردووە و نانی ئەبڕی . ئەمە لەسەردەمی شاخ لەگەڵمان بووە مافی خۆیەتی ئێمە مووچەی بدەینێ و ژیانی تەئمین بکەین ..

ئەو مەوقیفەی لەمامم بینی قەت لەبیرم ناچێ ، چونکە ئەو رابەڕەی ئێمە یەک بە یەک هەموو پێشمەرگەو کادیرەکانی یەکێتی دەناسی و هەمیشە لەخەمی بژێوی ژیانیان بوو . سەردەمی مام هەموو تێکۆشەرێکی یەکێتی مافی خۆی وەردەگرت ورێز لە خەباتو قوربانیدانی دەگییرا .مەوقیفی زۆر گەورەتریشم لەم رابەڕە مەزنە بینیوە کە ڕەنگە زۆربەی هەڤاڵانیشمان پێیان زانیبێ . بۆیە هەموو جارێ ئەلێم کۆچی مام جەلال هەموومانی هەتیو کرد ، کوردستانەکەشمان وێران بوو عیراقیش سەرنگوم بوو . باقی وەلسەلام .