مێژووی زیندوو و ڕێبازی گەشاوەی سەرۆک مام جەلال

نۆ ساڵ بەسەر کۆچی دوایی ڕابەری نەتەوەیی و نیشتمانیمان، سەرۆك مام جەلال تێپەڕ دەبێت بەڵام حیکمەت و ئەندێشەی سیاسی و بەها بەرزەکانی ئەو ڕۆژ بە ڕۆژ لە هەناوی پرۆسەی سیاسیی کوردستان و عێراقدا زیندووتر دەبنەوە، مام جەلال خوێندنگایەکی گەورەی پێکەوەژیان و عەقڵانییەتی سیاسی و خەباتی سەربەرزانە بوو.
زیاتر لە حەوت دەیە لە تەمەنی تەرخانکرد بۆ سەرفرازیی گەلەکەی لە سەنگەری پێشمەرگایەتی و ڕێبەرایەتیکردنی شۆڕشی نوێوە تا دەگاتە ترۆپکی خەباتی دەوڵەتداری و بوون بە یەکەم سەرۆك کۆماری کورد لە عێراقی تازەدا، مام جەلال توانی ناسنامەی کورد لە پەراوێزەوە بباتە ناوەندی بڕیاردان و ببێتە "سەمامی ئەمان"ی پاراستنی مافەکانی گەلی کورد و سەرجەم پێکهاتەکانی عێراق.
ئەمڕۆ لە هەموو کاتێك زیاتر نیازمەندین بگەڕێینەوە بۆ ڕێبازەکەی مام، ڕێبازی هاوبەشی و هاوسەنگی و دیالۆگی نیشتمانی، چارەسەرکردنی ڕیشەیی کێشەکانی کوردستان و بەتایبەت پرسی ناوچە دابڕێنراوەکان و شاری کەرکوک کە مام جەلال هەمیشە وەک سیمبولی پێکەوەژیان دەیبینی و بە قودسی کوردستان ناوی دەبرد و تەنها بە ڕۆحییەتی مام و درێژەدان بە نەخشەڕێگە دەستوورییەکەی ئەو بەدی دەهێنرێت.
لەم ساڵیادەدا تەنها بەرز ڕاگرتنی ناوەکەی بەس نییە، بەڵکو وەفاداریی ڕاستەقینە لەوەدایە کە ڕێبازەکەی ببێتە کۆڵەکەی بەهێزکردنی ئەزموونی هەرێمی کوردستان و گەشەپێدانی حوکمڕانیی دەستووری، هەروەک چۆن یەکێتیی نیشتمانیی کوردستان بە سەرۆکایەتیی سەرۆک بافل جەلال تاڵەبانی لەسەر هەمان ڕێچکەی نەپساوە بەردەوامە.