لە نۆیەمین ساڵڕۆژی کۆچی دوایی جەنابی مام جەلالدا

لە نۆیەمین ساڵڕۆژی کۆچی دوایی جەنابی مام جەلالدا، جارێکی دیکە ئەو ڕاستییەمان بۆ دەردەکەوێت کە ڕێباز و سیاسەتی ئەو تەنها بۆ قۆناغێکی دیاریکراو نەبوو، بەڵکو بۆ عێراق و ناوچەکەی ئێستاش پێویستییەکی گرنگە.

لە کاتێکدا کە ناوچەکەمان بەڕووی گۆڕانکاری و ملمێلانێی گەورەی سیاسی و ئەمنی و هەرێمایەتی و نێودەوڵەتیدا تێدەپەڕێت، عێراق زیاتر لە هەر کاتێک پێویستی بەو سیاسەتە هەیە کە مام جەلال نوێنەرایەتی دەکرد؛ سیاسەتی دیالۆگ لەبری ناکۆکی، نزیککردنەوە لەبری دوورخستنەوە، و گەڕان بەدوای خاڵە هاوبەشەکاندا لەبری قووڵکردنەوەی جیاوازییەکان.

مام جەلال بە باشی لەو ڕاستییە تێگەیشتبوو کە عێراق وڵاتێکی فرە نەتەوە، فرە ئایین، فرە مەزهەب و فرە بۆچوونە، و هیچ لایەنێک ناتوانێت بە تەنها عێراق بەڕێوەببات یان ئارامی و داهاتووی ئەم وڵاتە مسۆگەر بکات. بۆیە هەوڵی دەدا جیاوازەکان لە دەوری مێزی گفتوگۆ کۆبکاتەوە و لە نێوان بەرژەوەندییە جیاوازەکاندا پردی متمانە دروست بکات.

ئەمڕۆ، لەبەردەم ئەو هەموو ئاڵۆزی و گۆڕانکارییانەی دەوروبەرمان، پاراستنی یەکڕیزی ناوخۆی عێراق و دوورخستنەوەی وڵات لە ملمێلانێ هەرێمایەتی و نێودەوڵەتییەکان پێویستی بە کلتووری دیالۆگ، هاوبەشی و بەرپرسیارێتی نیشتمانی هەیە.

بەتایبەتی ئێمەی کەرکوکی، کە شارەکەمان وێنەیەکی بچووکی هەموو عێراقە، پێویستە زیاتر لە هەر شوێنێکی دیکە ئەم وانەیە لە ڕێبازی مام جەلال وەربگرین؛ کورد و عەرەب و تورکمان و پێکهاتەکانی دیکە، جیاوازییەکانمان بکەینە هۆکاری دەوڵەمەندی نەک ناکۆکی، و خاڵە هاوبەشەکانمان بەهێز بکەین، تا ملمێلانێ سیاسییەکان سەرنجمان لە خزمەتکردن، ئاوەدانکردنەوە و دروستکردنی داهاتوویەکی باشتر بۆ کەرکوک و عێراق لادەن.

باشترین وەفاداری بۆ مام جەلال تەنها یادکردنەوەی ناوی نییە؛ بەڵکو زیندوو ڕاگرتنی ئەو ڕێبازەیە کە باوەڕی بە گفتوگۆ، پێکەوەژیان، قبووڵکردنی جیاوازی و کۆکردنەوەی هەمووان لەسەر بەرژەوەندییە باڵاکانی نیشتمان هەبوو.
ڕۆحی ڕەوانی مام جەلال شاد و یادی هەمیشە بەخێر بێت.