هێرۆخان... حزبایەتی لە تەنگانەدا

2024-06-12

هێرۆخان هاورێی ژیان و تێکۆشانی سەرۆک مام جەلالە، بۆیە رەهەندی تێکۆشانی سیاسیی  وی مەعلومی هەمووانە، بەڵام بەشی زۆری کارکردنی هێرۆخان  لە رەهەندە فراوانەکەی سیاسەتی نیشتمانی و نەتەوەییدا تەرخانی کەلتور، هونەر، میدیا، چالاکیی کۆمەڵایەتی و پرۆژە ستراتیژە مرۆڤدۆستانەکانی بوو.

حزبایەتی ئاشکرا و راستەوخۆی ئەو کاتە دەرکەوت و تۆخبۆوە کە لەسەردەمی تەنگژەکاندا هاتە سەرخەت و نەترسانە و بوێرانە داکۆکی لە یەکێتی و حزبایەتی راستەقینە کرد، بەتایبەتی ئەو کاتەی پیلانگێڕیی گەورە لەسەر یەکێتی تەنگی بە سیاسەت و کوردایەتی هەڵچنیبوو و ئینجا مام جەلالیش بەهۆی نەخۆشییەوە لە پشووی جەنگاوەریدابوو، زۆر بوون ئەوانەی فاتیحایان بۆ نەمانی یەکێتی دەخوێند و زۆر مودەعی تێزی بەدیلی یەکێتی و مام جەلالیان دەخستە بازاڕەوە، جا ئەو کاتە هەبوون لە سامانی ماددی و مەعنەوی یەکێتیان دەخوارد و بە کاریان دەهێنا کەچی پێیان شەرم بوو ناوی  یەکێتی بێنن یان دوو قسەی خێری بۆ بکەن،  بە ناوی دیموکراتی و باقوبریقی ترەوە گاڵتەیان بە نەریتی حزبایەتی و شانازی حزبی دەکرد،  گوایە حزبایەتیی تەسک باوی نەماوە و شەرمە شەڕەپەڕۆی بۆ بکەیت.  ئا لەو تەنگانەدا هێرۆ خانی حریفی حزبایەتی و دڵسۆزی یەکێتیبوون دەرسی پێشکەشکرد و دەرکەوت. جگە لە داکۆکییە رەسەن و جەوهەرییەکانی لە بەرژەوەندییە باڵاکانی یەکێتی لە ئاماژە، ئاڵا و لۆگۆشدا هەمیشە سەربەرزی و سەرفرازی یەکێتی زەق دەکردەوە. جلی سەراپای سەوز و یەکێتیانەی دەپۆشی و تەنانەت ئۆتۆمبیل و کەرەستەکانی ڤلێکس و قەڵەمیشی سەوز دەکرد. زۆربەمان چالاکییەکانی ئەو کاتەی لە بیرە کە لە کەمپینی هەڵبژاردن و جۆش و خرۆشی جەماوەریدا ئەم جلوبەرگانەی دەپۆشی .

هێرۆ خان هیچ مەجبور نەبوو دوای ئەو مێژووە گەورەی خەباتی سیاسی، شۆڕشگێری و پێشمەرگایەتی خۆی و دوای ئەوەی هەموو یەکێتی بە دادە و خوشکی گەورە و مامۆژن بانگیان دەکرد و حورمەتی هاوشانی  مام جەلالی هاوسەنگەری هەبوو ، ئەم ئاماژە حزبیانە پەیڕەو بکات، بەڵام تینوتاوی کوردایەتی و تێگەیشتنی قووڵی لەسەر رۆڵی مێژوویی یەکێتی و رۆڵی بەهاداری حزبایەتی لە تەنگژەکاندا ئەنگێزەی سەوزپۆشی و حزبایەتی بەرچاوی هەڤاڵ هێرۆ بوو.
ئەو لە تەنگژەدا خۆی لە ئەرکی سەرشان نەشاردەوە  ئازایانە، ژنانە و دادانە هاتە کۆڕی سەوزەوە.

بەمەش دەرس و وانەیەکی مەزنی حزبایەتی نیشان داین کە لە تەنگژەدا بێیتە جواب  و لە شێنەییدا  فراوانتر و نەتەوەیی بڕوانیت.

ئەم وێنەیەی  هێرۆخان وێستگەی حزبایەتی ئازایانەی ئەو لە ناو یەکێتی و کوردایەتی دەردەخات.
بەو بۆنەیەوە یادی لەدایکبوونی پیرۆز بێت و تەمەنی بۆ کورد و یەکێتی پڕ بەرەکەت بێت.

زیاتر بخوێنەرەوە

Copyright © 2024 . PJT Foundation. All right reserved