دامەزراوەی سەرۆک جەلال تاڵەبانی و زانکۆی راپەڕین یاداشتنامەی لێکتێگەیشتن واژۆ دەکەن

رۆژی سێشەممە رێکەوتی ١٦ی ئایاری ٢٠٢٣ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ بەڕێز پ. ی .د . خاتوو پەیمان رەمەزان، سەرۆکی زانکۆی راپەڕین واژۆ کرد.
لە کۆبوونەوەیەکەدا باڵیۆز د. محەمەد سابیر؛ باسی لە گرنگی زانكۆی ڕاپەڕین کرد و وتی: " زانکۆی راپەڕین ناوەندێكی گرنگی رۆشنبیرییە و زانستییە لە سنوورەكەدا و ئامادەیی تەواومان هەیە بۆ هاوكاریكردنی تەواوی خوێندکاران و مامۆستایانی زانکۆکە".

لە یاداشتنامەی لێکتێگەیشتنەکەدا هاتووە: "کردنەوەی خولی بەهێزکردن و هەماهەنگی لەنێوان دامەزراوەی سەرۆک جەلال تاڵەبانی و زانکۆی راپەڕین لەبواری گەشەپێدانی مرۆیی، پێگەیاندنی کادر، ئاڵوگۆڕی زانیاری، ئەزموون و پڕکردنەوەی کەلێنەکان لەبوارە جیاوازەکاندا بۆ پێشکەشکردنی خزمەتگوزارییە پێویستییەکان و دابینکردنی ژینگەیەکی گونجاو بۆ خوێندکاران و پێگەیاندن".

باڵیۆز د. محەمەد سابیر لەبارەی ئامانجی لێکتێگەیشتنەکەوە وتی: "ئەم لێکتێگەیشتنە بۆ پەرەپێدانی هاوبەشی ستراتیجییە لەنێوان دامەزراوەی سەرۆک جەلال تاڵەبانی و زانکۆی راپەڕین-دا، هەروەها پشتگیریکردن لە پەرەپێدانی پرۆژە و چالاکییە هاوبەشەکان و کۆکردنەوەی سەرچاوەی پەیوەندیدار و دابینکردنی هێڵکارییەکی فراوانی بەرپرسیاریەتییەکان".

"لە ئاییندەدا بە هاوبەشی لەگەڵ زانکۆی راپەڕین دەستدەکەین بە جێبەجێکردنی ناوەڕۆکی ئەو لێکتێگەیشتنە و دەیخەینە خزمەت خوێندکاران و دەبێتە هۆی سوودمەندبوونیان." باڵیۆز د. محەمەد سابیر لە کۆبوونەوەیەکی رۆژنامەنووسیدا وای وت.