بەردی بناغەی زانکۆی کۆیە نۆژەندەکرێتەوە و پارکێکی بۆ دروست دەکرێت

رۆژی یەکشەممە رێکەوتی ١١ی ١٠ی ٢٠٢٦ بەڕێز قوباد تاڵەبانی، جێگری سەرۆک وەزیرانی هەرێمی کوردستان و بە ئامادەبوونی باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و پ. د. محەمەد حەسیب، سەرۆکی زانکۆی کۆیە و بەڕێز کوردە عومەر، لێپرسراوی مەڵبەندی ١٤ی کۆیەی یەکێتیی نیشتمانیی کوردستان و کۆمەڵێک مامۆستای زانکۆکە پاش نۆژەنکردنەوە بەردی بناغەی زانکۆی کۆیە و دروستکردنی پارکێک بۆ بەردی بناغەی زانکۆکە کرایەوە.

نۆژەنکردنەوەی بەردی بناغەی زانکۆی کۆیە و دروستکردنی پارکێک بۆ بەردی بناغەی زانکۆکە بە هاوبەشی زانکۆی کۆیە و دامەزراوەی سەرۆک جەلال تاڵەبانی بووە، نۆژەنکردنەوەی بەردی بناغەی زانکۆی کۆیە دروستکردنی پارکەکە دیزاینێکی نوێ سەردەمیانەی بۆ کراوە و دۆستی ژینگەیە پشتبەستراوە بە بەرهەمهێنانی کارەبا لە وزەی پاک بۆ پڕکردنەوەی پێداویستییەکانی.

بەردی بناغەی زانکۆی کۆیە لە ساڵی ٢٠٠٣ لەلایەن سەرۆک جەلال تاڵەبانی- دامەزرێنەری زانکۆکەوە دانراوە، سەرۆک جەلال تاڵەبانی بۆ زانکۆ کۆیە دەڵێت :"ئەم زانکۆیە دەبێتە مەشخەڵ هەڵگری زانین و عیلم و پێشکەوتن لە ناوچەکەدا. کۆیە بەڕاستی ناوچەیەکی زۆر گرنگ و ئەهمییەتی خۆی هەیە، چونکە ئەوشارە بەڕاستی شایستەی ئەوەیە ناوچەیەکی ناوەندی عیلمی بیت لە بۆ کوردستانی عێراق و لە بۆ عێراق"
زانکۆی کۆیە وێڕای خوێندنی ماستەر و دکتۆرا، چەند کۆلێج و بەشی جیاواز لەخۆی دەگرێت.