دامەزراوەی سەرۆک جەلال تاڵەبانی (PJTF) یاداشتنامەی لێکتێگەیشتن لەگەڵ زانکۆی کۆمار واژۆ دەکات

رۆژی سێشەممە رێکەوتی ١٢ی ئەیلولی ٢٠٢٣ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی یاداشتنامەی لێکتێگەیشتنی لەگەڵ بەڕێز د. سەڵاحەدین عەلی، سەرۆکی زانکۆی کۆمار بۆ زانست و تەکنەلۆجیا واژۆ کرد.

لە چوارچێوەی ئەم لێکتێگەیشتنەدا دامەزراوەی سەرۆک جەلال تاڵەبانی زۆرترین پرۆژەی لەگەڵ زانکۆی کۆمار دەبێت و لەو بارەیەوە باڵیۆز د. محەمەد سابیر وتی:

"ئامانج لە واژۆکردنی ئەم یاداشتنامەیە پەرەپێدانی هاوبەشی ستراتیجییە لەنێوان هەردوو لایەندا، پشتگیریکردن لە گەشپێدان، پرۆژە و چالاکییە هاوبەشەکانە".

لە یاداشتنامەی لێکتێگەیشتنەکەی نێوان دامەزراوەی سەرۆک جەلال تاڵەبانی و زانکۆی کۆمار-دا هاتووە: "هەماهەنگیی زیاتر لەنێوان دامەزراوەی سەرۆک جەلال تاڵەبانی و زانکۆی کۆماردا کۆمەڵێک بوار لە خۆدەگرێت، لە وانەش بوارەکانی پزیشکی، سوودبینین لە کادری پێویست بۆ پلان و کاری داهاتوو، گەشەپێدانی مرۆیی، ئاڵوگۆڕی زانیاری، وەرگرتنی زەمالەی خوێندن بۆ زانکۆکە، ئەزموون و پڕکردنەوەی کەلێنەکان بۆ پێشکەشکردنی خزمەتگوزارییە پێویستییەکان".

بڕیارە لە ئاییندەیەکی نزیکدا ئەو لێکتێگەیشتنە بخریتە خزمەت خوێندکاران و ناوەڕۆکەکەی جێبەجێ بکرێت، لە چوارچێوەی ئەم لێکتێگەیشتنەدا زۆرترین پرۆژەی هاوبەش ئەنجامدەدرێت.