دامەزراوەی سەرۆک جەلال تاڵەبانی سەردانی زانکۆی ڕاپەڕین دەکات

ڕۆژی دووشەممە ٢٧ی٢ی ٢٠٢٣ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی، بەیاوەری خاتوو پەروین بابەکر، ئەندامی ئەنجوومەنی ڕاوێژکاریی دامەزراوە و بەڕێز ئەحمەد زرار، لێپرسراوی مەڵبەندی ٢٤ی ڕاپەرینی یەکێتی و وەفدێکی دامەزراوە سەردانی زانكۆی ڕاپەڕین-یان كرد و لەلایەن بەڕێز پ. ی .د . خاتوو پەیمان ڕەمەزان، سەرۆكی زانكۆ و ژمارەیەك لە ئەندامانی ئەنجوومەنی زانكۆی ڕاپەرین پێشوازیان لێكرا.

لەكۆبوونەوەیەكەدا لەگەڵ ئەنجوومەنی زانکۆی ڕاپەرین باڵیۆز د. محەمەد سابیر، ڕوونیکردەوە کارکردنی دامەزراوەی سەرۆك جەلال تاڵەبانی لە دیدگەی سەرۆک مام جەلالەوە سەرچاوەی گرتووە و دەیانەوێ ڕۆڵێکی بوونیادنەرانە لە ئاستی کۆمەڵگە بگێڕن بە تایبەت لەبواری ڕۆشنبیری، کولتووری، زانسی و گەشەی مرۆیی.

هەر لە کۆبوونەوەکەدا باڵیۆز د. محەمەد سابیر؛ باسی لەوەشكرد كە زانكۆی ڕاپەڕین ناوەندێكی گرنگی ڕۆشنبیرییە لەسنوورەكەداو ئامادەیی تەواویان هەیە بۆ هاوكاریكردنی دەڤەری ڕاپەڕین كە لانكەی شۆڕش و جوڵانەوە سیاسییەكان بووە لە کوردستاندا.

دواتر سەرۆكی زانكۆی راپەڕین، بەگرنگییەوە باسی لە پەیوەندییان لەگەڵ دامەزراوەی سەرۆك جەلال تاڵەبانی و زانكۆ كرد بە ئامانجی جێبەجێکردنی پرۆژە و كاری هاوبەش، داواشی لە سەرۆك و تیمی دامەزراوەكە كرد كە هاوكاری زانكۆی ڕاپەڕین و دەڤەرکەبن لە ئەنجامدانی چالاكی و پرۆژەكاندا بەتایبەت لەڕووی زانستی و گەشەدان بە توانای مرۆیی، ئاماژەی بەوەدا؛ كە زانكۆی ڕاپەڕین هاوكار و پشتیوان دەبێت بۆ ئەنجامدانی چالاكییەكانی دامەزراوە.

لە کۆتایی كۆبوونەوەكەدا؛ هەردوولا بڕیاریاندا لە داهاتوویەكی نزیكدا یاداشتی لێكتێگەیشتن لەنێوان دامەزراوەی سەرۆك جەلال تاڵەبانی و زانكۆی ڕاپەڕین بەشێوەیەکی فەرمی واژۆ بكرێت