سەرۆکی دامەزراوەی سەرۆک جەلال تاڵەبانی سەردانی کەنیسەی مار یوسف دەکات

رۆژی دووشەممە رێکەوتی ٦ی تشرینی دووەمی ٢٠٢٣ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و شاندێکی یاوەری سەردانی کەنیسەی مار یوسفی لە شاری سلێمانی کرد و لەلایەن قەشە ئەیمەن عەزیز پێشوازی لێکرا.

لە دیدارێکدا؛ هەردوولا باسیان لە بوارەکانی کارکردن و پرۆژەکانی دامەزراوەی سەرۆک جەلال تالەبانی کرد، هاوڕابوون لەسەر بەردەوامی پەیوەندیی نێوان هەردوولا و هەماهەنگی و هاریکاریی نێوانیان لە سەرجەم بوارەکاندا.

لە بەشێکی دیکەی دیدارەکەدا قەشە ئەیمەن تیشکی خستە سەر یارمەتی و هاوکارییەکانی رابردووی سەرۆک مام جەلال بۆ مەسیحییەکانی شاری سلێمانی وتی:

"مام جەلال سەرۆکی ئارامی، دۆستایەتی، پێکەوەژیان و سەقامگیریی بوو بۆ عیراقییەکان" و وتیشی: "ژیری و دیپلۆماسییەتی سەرۆک مام جەلال باڵی کێشابوو بەسەر تەواوی عیراقدا".