دامەزراوەی سەرۆک جەلال تاڵەبانی و وەزارەتی ژینگەی عیراق یاداشتنامەی لێکتێگەیشتن واژۆ دەکەن

شاندێک لە وەزارەتی ژینگەی حکومەتی فیدراڵ بە سەرۆکایەتی د. جاسم عەبدولعەزیز فەلاح، بریکاری وەزارەت و شاندی یاوەری رۆژی ٢ی حوزەیرانی ٢٠٢٤ سەردانی دامەزراوەی سەرۆک جەلال تاڵەبانی-یان کرد.

باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی، پاڵپشتی دامەزراوەکەی بۆ وەزارەتی ژینگە دووپاتکردەوە لەڕێگەی چالاکی بنیاتنانی توانا و بەشداریی تەواو و بڵاوکردنەوەی رۆشنبیریی ژینگەیی و بەرەوپێشبردنی ژینگەیی دروست لەڕێگەی گرنگیدان بە هۆشیاری ژینگەیی و بەرنامەی پەروەردەیی وەک ( خولەکان، وۆرک شۆپی راهێنان، سیمینار و بەرنامەی پەروەردەیی کاریگەر).

سەبارەت بە بڵاوکردنەوەی رۆشنبیریی ژینگەیی، روواندنی دار و گرنگیدان بە پانتایی سەوزایی، سەرۆکی دامەزراوەی سەرۆک جەلال تاڵەبانی داوای لە وەزارەتی ژینگە کرد پاڵپشتی دامەزراوەکە بکات لە تەواوکردنی ئەو پرۆژانەی کە ئامانجیان زیادکردنی پانتایی سەوزاییە، بە تایبەت (پارکی شەهیدان و پارک ئان کلۆید لە سلێمانی) کە دامەزراوەی سەرۆک جەلال تاڵەبانی گرنگییەکی زۆری پێدەدات، جگە لە پرۆژەکانی دیکە.

سەرۆکی دامەزراوەی سەرۆک جەلال تاڵەبانی، یاداشتنامەی لێکتێگەیشتن پێشکەش بە بریکاری وەزارەت کرد کە هەموو ئەو خاڵ و داواکارییانەی لە سەرەوە باسکراون لەخۆگرتبوو.

لای خۆیەوە د. جاسم عەبدولعەزیز فەلاح، بریکاری وەزارەتی ژینگەی عیراق، گرنگیدانی زۆری خۆی بۆ ئەو پێشنیازانە نیشاندا کە پێشکەش کران، ئامادەیی وەزارەتەکەی دەربڕی بۆ هاوکاری، ئاڵوگۆڕی ئەزموونەکان و سوود وەرگرتن لەوەی لە توانایاندایە، بریکاری وەزارەت باسی لەوە کرد بەشدارن دەبن لە باشترکردنی پرسەژینگەییەکان و دۆزینەوەی چارەسەر بۆیان، لە هەمان کاتدا جەخت لەسەر پێویستی بەپەلەی هاوکاریی ئەو دامەزراوانە دەکەنەوە کە تایبەتن بەبواری ژینگە و بەشداری راستەقینە لە رووبەڕووبوونەوەی گۆڕانکارییە ژینگەیی و کەشوهەوا، کە پێویستی بە هەماهەنگی هاوبەش هەموو لەلایەنەکان هەیە بۆ کەمکردنەوەی کاریگەرییەکانی کەشوهەوا.

هەردوولا رێککەوتن لەسەر واژۆکردنی یاداشتێکی لێکتێگەیشتن بۆ هاوکاری نێوان دامەزراوەی سەرۆک جەلال تاڵەبانی و وەزارەتی ژینگە لەماوەی داهاتوودا لە بەغدای پایتەخت، بۆئەوەی پێکەوە کاربکەن بۆ جێبەجێکردنی ئەو پێشنیاز و داواکاریانەی لە کۆبوونەوەکەدا باسکراون، هەروەها  دانانی پلانی کارکردنی هاوبەش لەنێوان هەردوولادا بۆ بەشداریکردن لە کەمکردنەوەی کاریگەرییە خراپەکانی  ژینگە.