دامەزراوەی سەرۆک جەلال تاڵەبانی و زانکۆی تیشک یاداشتنامەی لێکتێگەیشتن واژۆ دەکەن

رۆژی چوارشەممە ١١ی ٩ی ٢٠٢٤ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ بەڕێز پ. د. خدر مەعسوم هەورامی، سەرۆکی زانکۆی نێودەوڵەتیی تیشک- سلێمانی واژۆ کرد.

لە یاداشتنامەکەدا هاتووە:"دامەزراندن و بەهێزکردنی هەماهەنگی لەنێوان دامەزراوەی سەرۆک جەلال تاڵەبانی و زانکۆی نێودەوڵەتیی تیشک- سلێمانی لەبواری هاوکاریی گەشەپێدان، ئاڵوگۆڕی زانیاری، ئەزموون و پێشکەشکردنی خزمەتگوزارییە پێویستییەکان و دابینکردنی ژینگەیەکی گونجاو بۆ خوێندکاران کاری لەسەر دەکرێت".

سەرۆکی دامەزراوەی سەرۆک جەلال تاڵەبانی وتی: "ئامانج لەم یاداشتە پەرەپێدانی هاوبەشیی ستراتیجییە لەنێوان هەردوو لایەندا و ئاسانکاری کردنە بۆ رێکخستنی میکانیزمی هاوکاریی بەردەوام و درێژخایەن، هەروەها پشتگیریکردن لە پەرەپێدانی پرۆژە و چالاکییە هاوبەشەکان و کۆکردنەوەی سەرچاوەی پەیوەندیدار و پێویست بۆ توێژەران لەبوارە جیاوازەکاندا ".

"لە ئاییندەدا بە هاوبەشی لەگەڵ زانکۆی نێودەوڵەتیی تیشک- سلێمانی دەستدەکەین بە جێبەجێکردنی ناوەڕۆکی ئەم لێکتێگەیشتنە و دەیخەینە خزمەت خوێندکاران و دەبێتە هۆی سوودمەندبوونیان."

باڵیۆز د. محەمەد سابیر وای وت.

بەڕێز پ. د. خدر مەعسوم هەورامی وتی: "زانکۆی تیشک ناوەندێكی گرنگی رۆشنبیرییە و زانستییە لە سنوورەكەدا و ئامادەیی تەواومان هەیە بۆ هاوكاریكردنی دامەزراوەی سەرۆک جەلال تاڵەبانی و جیبەجێکردنی ناوەڕۆکی لێکتێگەیشتنەکە".