دامەزراوەی سەرۆک جەلال تاڵەبانی و دامەزراوەی ئینکی (ENKI) یاداشتنامەی لێکتێگەیشتن واژۆ دەکەن

رۆژی سێشەممە رێکەوتی ۲٥ی ۲ی ٢٠٢٥ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ د. کەوسەر ئەلغەرابی، سەرۆکی دامەزراوەی ئینکی بۆتوێژینەوە و لێکۆلینەوە لە شاری بەغدا واژۆ کرد.

لە دیداریکدا باڵیۆز د. محەمەد سابیر باسی لە گرنگی دامەزراوەی ئەنکی کرد و وتی: "دامەزراوەی ئینکی ناوەندێكی گرنگی رۆشنبیرییە و زانستییە لە عێراقدا و ئامادەیی تەواومان هەیە بۆ کاری هاوبەش لەگەڵ ئەم دامەزراوەیە لەبواری توێژینەوە و لێکۆڵینەوە".

لە یاداشتنامەی لێکتێگەیشتنەکەدا هاتووە: "کردنەوەی خولی بەهێزکردن و هەماهەنگی لەنێوان دامەزراوەی سەرۆک جەلال تاڵەبانی و دامەزراوەی ئەنکی لەبواری توێژنەوە و لێکۆڵینەوە، پێگەیاندنی کادر، ئاڵوگۆڕی زانیاری بۆ نووسینی توێژینەوەی زانستی کاری هاوبەشمانە".

باڵیۆز د. محەمەد سابیر لەبارەی ئامانجی لێکتێگەیشتنەکەوە وتی: "ئەم لێکتێگەیشتنە بۆ پەرەپێدانی هاوبەشی ستراتیجییە لەنێوان دامەزراوەی سەرۆک جەلال تاڵەبانی و دامەزراوەی ئەنکی، پشتگیریکردن لە پەرەپێدانی پرۆژە و چالاکییە هاوبەشەکان و کۆکردنەوەی سەرچاوە بۆ توێژینەوە و لێکۆڵینەوە".
د. کەوسەر ئەلغەرابی دەڵێت: "مەبەستمانە ئەم لێکتێگەیشتنە لەگەڵ دامەزراوەی سەرۆک جەلال تاڵەبانی واژۆ بکەین بۆ گواستنەوەی زانیاری، راهێنانی توێژەران، وەرگێڕان، توێژینەوەی هاوبەش و رێکخستنی وۆرک شۆپی پێویست".

"لە ئاییندەدا بە هاوبەشی لەگەڵ دامەزراوەی ئەنکی دەستدەکەین بە جێبەجێکردنی ناوەڕۆکی ئەو لێکتێگەیشتنە و دەیخەینە خزمەت توێژەان و لێکۆڵەرەوان ." باڵیۆز د. محەمەد سابیر وای وت.