دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ دامەزراوەی کەریمی عەلەکە واژۆ دەکات

رۆژی ٢٥ی حوزەیرانی ٢٠٢٥ باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی یاداشتنامەی لێکتێگەیشتن لەگەڵ بەڕێز شاخەوان سدیق، بەڕێوەبەری دامەزراوەی کەریمی عەلەکە واژۆ کرد.

لە یاداشتنامەی لێکتێگەیشتنی نێوان دامەزراوەی سەرۆک جەلال تاڵەبانی و دامەزراوەی کەریمی عەلەکە کە واژۆی هەردوو سەرۆک دامەزراوەی سەرۆک جەلال تاڵەبانی و بەڕێوەبەری دامەزراوەی کەریمی عەلەکەی لەسەرە هاتووە: "هاوبەشی و هاوکاریی نێوان هەردوو دامەزراوە لە کۆکردنەوەی ئەو بەڵگەنامانەی کە پەیوەندی بە کورد و کوردستانەوە هەیە و تایبەتمەندیی ئەرشیفییان هەیە، هەروەها هەماهەنگی نێوان هەردوولا بۆ بەشداریکردن لە چالاکی و کۆنفرانسی نێودەوڵەتیی تایبەت بە کاری کولتووری و رۆشنبیری‌ لەبوارەکانی (مێژوو، زمان، سیاسی، پەروەردە و ژینگە...)".
‌

لە لێکتێگەیشتنەکەدا باسی ئەوەش کراوە: "هەماهەنگی لەنێوان هەردوو دامەزراوە بۆ بڵاوکردنەوە و چاپکردنی ئەو بەرهەمانەی کە پەیوەندی بە ئامانجەکانی هەردوولاوە هەیە، کارکردن لەبواری پرسی دیبلۆماسییەتی کولتووری و ئەنجامدانی دیداری هاوبەش لەوبوارەدا".

لە کۆتایی یاداشتەکەدا نووسراوە: "بەشداریپێکردنی کارمەندانی هەردوو دامەزراوە لە خولە تایبەتەکانی بواری گەشەپێدانی مرۆیی".

لێکتێگەیشتنی دامەزراوەی سەرۆک جەلال تاڵەبانی و دامەزراوەی کەریمی عەلەکە بۆماوەی یەک ساڵە، دوای ساڵەکە دەسەڵات دەدرێت بە هەردوو دامەزراوەکە لێکتێگەیشتنی نوێ واژۆ بکەنەوە ئەگەر پێویست بوو


دامەزراوەی سەرۆک جەلال تاڵەبانی دامەزراوەیەکی ناحکومی سەربەخۆی قازانج نەویست و بێلایەنی کەلتووری، مرۆڤایەتی و نیشتیمانییە، کاردەکات بۆ ناساندن، ئەرشیفکردن، پاراستنی ژیان و خەباتی سەرۆک جەلال تاڵەبانی،  دامەزراوەی کەریمی عەلەکە  دامەزراوەیەکی خێرخوازیی کولتوورییە، گرنگی دەدات بە پرسە جیاوازەکانی کۆمەڵگە و پرسی کەلتوور بەشێوەیەکی گشتی.