دامەزراوەی سەرۆک جەلال تاڵەبانی و بەڕێوەبەرایەتیی گشتیی رۆشنبیری و هونەری سلێمانی یاداشتنامەی لێکتێگەیشتن واژۆ دەکەن

رۆژی دووشەممە رێکەوتی ٢٨ی ٧ی ٢٠٢٥ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی یاداشتنامەی لێکتێگەیشتنی لەگەڵ د. موحسین ئەدیب، بەڕێوەبەری گشتیی رۆشنبیری و هونەری سلێمانی واژۆ کرد و ئەم لێکتێگەیشتنە لەپێناو بایەخدان و پەرەی زیاتر بە لایەنی کەلتورییی و هونەری و ئەرشیفی لە شاری سلێمانی کە پایتەختی رۆشنبیریی هەرێمی کوردستانە و یەکێک لە شارە داهێنەرە ئەدەبییەکانی یونسکۆ.

لە یاداشتنامەی لێکتێگەیشتنی نێوان دامەزراوەی سەرۆک جەلال تاڵەبانی و بەڕێوەبەرایەتیی گشتیی رۆشنبیری و هونەری سلێمانی هاتووە: "ئەنجامدانی چەند کارێکی هاوبەش وەک فێستیڤاڵ، دیدار، سیمینار و پانێڵ بەپێی خشتەیەک کە رەزامەندی هەردوولای لەسەر بێت، دامەزراوەی سەرۆک جەلال تاڵەبانی بەپێی پێویست هاوکاریی ماددیی و سپۆنسەر دابین دەکات بۆ کارە هاوبەشەکان، بەتایبەت تا ئەوکاتەی رەوشی دارایی حکومەتی هەرێمی کوردستان بەم شێوەیەی ئێستا بێت، ئەمەش بە هاوکاریی هەردوولا دەکرێت".

لە لێکتێگەیشتنەکەدا باسی ئەوەش کراوە: "بەڕێوەبەرایەتیی گشتیی رۆشنبیری و هونەری سلێمانی سەرجەم فەرمانگە و بەڕێوەبەرێتی و بەشەکانی وەک سەرمایە و هێزی مرۆیی دەخاتە خزمەت کارە هاوبەشەکانی هەردوولا لە ناوەندی شاری سلێمانی و لە قەزا و ناحیەکانی سەر بە پارێزگای سلێمانی بە گشتی".
لە کۆتایی یاداشتەکەدا نووسراوە: "بەڕێوەبەرایەتی گشتیی رۆشنبیریی و هونەری سلێمانی هاوکاریی دامەزراوەی سەرۆک جەلال تاڵەبانی دەکات بۆ دەوڵەمەندترکردنی ئەو ئەرشیفە گەورەیەی کە هەیانە لەبارەی، رەوانشاد سەرۆک مام جەلال، بەتایبەت کە هاوڕێ و دۆستی هونەرمەندان و رۆشنبیران بووە".



دامەزراوەی سەرۆک جەلال تاڵەبانی؛ دامەزراوەیەکی ناحکومی سەربەخۆی قازانج نەویست و بێلایەنی کەلتووری، مرۆڤایەتی، نیشتیمانییە، کاردەکات بۆ ناساندن، ئەرشیفکردن، پاراستنی ژیان و خەباتی سەرۆک جەلال تاڵەبانی.
بەڕێوەبەرایەتیی گشتیی رۆشنبیری و هونەری سلێمانی یەکێکە لە فەرمانگە حکومییەکانی سەر بە وەزارەتی رۆشنبیری و لاوانی حکومەتی هەرێمی کوردستان.