یەكەمین كۆنفرانسی زانستیی نێودەوڵەتیی سەرۆك جەلال تاڵەبانی لە زانكۆی سلێمانی بەڕێوەدەچێت

رۆژی شەممە ٤ی١٠ی ٢٠٢٥ بەبۆنەی هەشتەمین ساڵیادی ژیانئاوایی سەرۆک جەلال تاڵەبانی، دامەزراوەی سەرۆك جەلال تاڵەبانی‌ بەهەمئاهەنگی زانــكۆی ســلــێمـانـی و هەریەك لە زانكۆكانی (كۆیە، راپەڕین، هەڵەبجە، گەرمیان، پۆلیتەكنیكی سلێمانی، پۆلیتەكنیكی گەرمیان، كۆمار، تیشكی نێودەوڵەتی‌، قەیوانی نێودەوڵەتی، جیهان و چەرموو)، بەدروشمی (سەرۆك مام جەلال راستی‌ و هەڵوێستە مێژووییەكان)، یەكەمین كۆنفرانسی زانستیی نێودەوڵەتیی سەرۆك جەلال تاڵەبانی لە زانکۆی سلێمانی ئەنجامدرا.

كۆنفرانسەكە بەسەرپەرشتی باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی و پ. د. كۆسار محەمەد، سەرۆكی زانكۆی سلێمانی‌ لە هۆڵەكانی كۆنگرێسی زانكۆی سلێمانی بەڕێوەچوو.

كۆنفرانسەكە (٩) تەوەری زانستی دەربارەی (ژیاننامە‌ و كەسایەتیی سەرۆك مام جەلال، رەهەندی سیاسی‌ و هزری‌ و شۆڕشگێریی سەرۆك تاڵەبانی، رۆڵی لە چەسپاندن‌ و سەروەری یاسا، رۆڵ‌ و كاریگەری سیاسەتی سەرۆك مام جەلال لە گرنگیدان بە پرس‌ و مافەكانی ژنان، كاریگەرییە ئەرێنییەكانی لەسەر سەقامگیری‌ و هاوسەنگیی سیاسی لە هەرێمی كوردستان‌ و عێراق، رۆڵی لە بواری پەروەردە و خوێندنی باڵا، رۆڵی لە بەدەستهێنان‌ و دابینكردنی مافەكانی نەتەوەی كورد لە هەر چوار پارچەكەی كوردستان‌ و مافی نەتەوەكانی تر و كەمایەتییەكان لە عێراقدا، رۆڵی لە رەوتی ئازادی رادەبڕین‌ و مافی مرۆڤ‌ و ئازادی میدیا‌ و چاپەمەنی لە هەرێمی كوردستان‌ و نەخش‌ و جێدەستی لە بواری سیاسی‌ و دبلۆماسیەتی گشتیدا) لەخۆگرتبوو.

لە یەكەم رۆژی كۆنفرانسەكەدا، پاشنیوەڕۆی ڕۆژی ٣ی تشرینی یەكەمی ٢٠٢٥، لە مەراسیمی هەشتەمین ساڵیادی ژیانئاوایی سەرۆک جەلال تاڵەبانیدا توێژەرەکان ناسێندران. 
رۆژی ٤ی تشرینی یەكەمی ٢٠٢٥، لە دووەم رۆژی كۆنفرانسی زانستیی نێودەوڵەتیی سەرۆك جەلال تاڵەبانی بە چەند پانێڵێك پێشكەشكران، لە کۆتایی مەراسیمەکەدا خەڵات، رێز و سوپاس بەخشرایە توێژەرەکان.

لە كۆنفرانسەكەدا (٢٠) توێژینەوە لەلایەن (٢٨) توێژەرەی هەرێمی کوردستان، عیراق و وڵاتانی جیهانەوە بەشداری پێکرابوو.